Tregtia elektronike në Shqipëri ka kaluar një transformim rrënjësor brenda vetëm një viti, duke u shndërruar nga një treg i fokusuar te blerjet vendase në një ekosistem kryesisht global. Të dhënat e vitit 2024 dhe gjysmës së parë të 2025 tregojnë një përmbysje të thellë të sjelljes së konsumatorëve dhe të strukturës së tregut. Në fillim të vitit 2024, shumica e blerjeve online ishin kombëtare: nga 2.6 milionë pako, mbi 2.3 milionë ishin brenda vendit, ndërsa vetëm 301 mijë kishin origjinë ndërkombëtare. Kategoritë kryesore ishin moda, elektronika, kujdesi personal dhe sporti, ndërsa produktet e shtëpisë zinin vetëm 5% të totalit. Por në gjysmën e parë të 2025-s panorama ndryshoi rrënjësisht. Volumi i përgjithshëm i pakove arriti në 4.9 milionë, një rritje 87% në krahasim me një vit më parë. Rritja më e habitshme ishte ajo e pakove ndërkombëtare, të cilat u rritën me 707%, duke kaluar nga 301 mijë në më shumë se 2.4 milionë. Për herë të parë në Shqipëri, dërgesat ndërkombëtare tejkaluan ato vendase në tremujorin e dytë 2025, duke e bërë vendin një treg “international-first”. Ky transformim u nxit nga disa faktorë: përmirësimi i shërbimeve postare, shpejtësia dhe transparenca e ndjekjes së pakove, por mbi të gjitha mundësia e pagesës “cash-on-delivery” edhe për porositë ndërkombëtare. Kjo e fundit shoi frikën e konsumatorëve nga pagesat online dhe i afroi ata me platformat globale si Temu, AliExpress, Shein apo Zara. Po aq i rëndësishëm ishte edhe ndryshimi në gamën e produkteve: platformat vendase nuk mund të konkurronin me diversitetin, çmimet dhe koleksionet e shpeshta të tregjeve globale. Kategoria që njohu rritjen më të shpejtë ishte ajo e produkteve të shtëpisë, e cila u rrit nga 5% në 18% brenda një viti. Ky trend tregon një ndryshim të stilit të jetesës së shqiptarëve, të cilët po investojnë më shumë në mobilim, dekor, ndriçim dhe pajisje të vogla. Në të njëjtën kohë, tregu i modës mbetet i madh, por jo më dominues; ndërsa kategoritë si elektronika, bukuria, sporti dhe librat shfaqin rritje të qëndrueshme. Ndërsa tregtia ndërkombëtare shënon rekord, tregu vendas po ngadalësohet. Rritja e pakove kombëtare ishte vetëm 6% në gjysmën e parë të 2025-s, shumë më e ulët se vitet e mëparshme. Edhe pse tregu nuk po bie, ai nuk është më motori kryesor i rritjes së e-commerce-it shqiptar. Projeksionet për pjesën e dytë të 2025-s dhe fillimin e 2026-s tregojnë se ritmet e larta do të vazhdojnë. Në gjashtëmujorin e dytë pritet të qarkullojnë deri në 7.7 milionë pako, ku 60–65% do të jenë ndërkombëtare. Vitin 2026 pritet ta nisë me 3–3.5 milionë pako vetëm në tremujorin e parë, me pakot ndërkombëtare mbi 55%. Në këtë realitet të ri, bizneset shqiptare duhet të përshtaten shpejt: platformat vendase të zgjerojnë gamën, të përmirësojnë shërbimin ndaj klientit dhe logjistikën, ndërsa institucionet publike të modernizojnë procedurat doganore. E-commerce në Shqipëri nuk është më lokal—është global. Kthim pas nuk ka.