Yağmur Ece Yüksel: Shqipëria ka gjithçka për nomadët digjitalë, por duhet të mbetet e përballueshme

Yağmur Ece Yüksel, e njohur në rrjetet sociale si Turkish Delight, e ka kthyer Shqipërinë në bazën e saj të jetesës dhe punës prej rreth një viti e gjysmë. Si krijuese përmbajtjeje, ajo e ka eksploruar vendin dhe Ballkanin përmes njerëzve, kulturës dhe gastronomisë, duke ndërtuar një komunitet të qëndrueshëm online. Sipas Yüksel, Shqipëria ka disa avantazhe të rëndësishme për nomadët digjitalë dhe profesionistët që punojnë në distancë: motin, ritmin më të qetë të jetës dhe sigurinë. Këta faktorë, të kombinuar me mundësinë për të punuar nga kudo, e bëjnë vendin një destinacion me potencial për profesionistët ndërkombëtarë. Ajo vlerëson se Shqipëria mund të shndërrohet në një nga destinacionet kryesore të punës në distancë në Ballkan, por paralajmëron se rritja e kostos së jetesës mund të dobësojë këtë avantazh. Sipas saj, ruajtja e përballueshmërisë do të jetë thelbësore për të mbetur konkurruese. Përvoja e jetesës në Shqipëri i ka dhënë gjithashtu një këndvështrim tjetër mbi kulturën vendase. Yüksel thekson se shqiptarët janë më të përqendruar te e tashmja, një qasje që e ka ndihmuar të vlerësojë më shumë momentin dhe të jetojë me më pak shqetësim për të ardhmen. Për të tërhequr dhe mbajtur profesionistët ndërkombëtarë për periudha më të gjata, ajo sheh thjeshtimin e përshpejtimin e procedurave administrative si një nga nevojat kryesore. Burokracia më e thjeshtë, sipas saj, do ta bënte përvojën e të jetuarit dhe punuarit në Shqipëri dukshëm më të lehtë. Ndërsa për ata që duan të ndërtojnë një karrierë si krijues përmbajtjeje, Yüksel ka një këshillë të drejtpërdrejtë: ta trajtojnë krijimin e përmbajtjes si një profesion me kohë të plotë. Suksesi, sipas saj, kërkon angazhim maksimal dhe, mbi të gjitha, fillimin pa e shtyrë më tej.