E themeluar në mars të vitit 2010 nga Igli Gjelishti, pas një eksperience të hershme në Top Channel, dev.al është sot një nga emrat kryesorë të sektorit të teknologjisë në Shqipëri. Me 15 vite në treg, kompania përfaqëson një histori suksesi të ndërtuar mbi korrektësi, përgjegjshmëri dhe burime njerëzore të qëndrueshme. Me mbi 90 punonjës, 23 mijë klientë aktivë dhe dhjetëra projekte të suksesshme, dev.al ka ndërtuar një reputacion të fortë si partner i besuar për zgjidhje software dhe digjitale. Një ndër arritjet e fundit është prezantimi i devBooks, një platformë kontabiliteti për biznese, që ka tejkaluar pritshmëritë që në muajt e parë pas lançimit. Por më shumë se kaq, kompania ka hyrë fuqishëm në sektorin Fintech, përmes blerjes së Rubicon dhe krijimit të platformës Pago – një zgjerim strategjik që plotëson ekosistemin e shërbimeve të ofruara për biznese, nga menaxhimi i operacioneve (devPMS), fiskalizimi (devPOS), kontabiliteti (devBooks), deri te pagesat (Pago). Pago përfaqëson një alternativë inovative për individët dhe bizneset në menaxhimin e financave: llogari rrjedhëse në pak minuta, pagesa të shpejta pa komision dhe kartë debiti Mastercard pa tarifa mirëmbajtjeje. Integrimi i ardhshëm i Shqipërisë në SEPA pritet të ulë ndjeshëm kostot për përdoruesit dhe të zgjerojë mundësitë e platformës. Gjelishti thekson se sfida kryesore për edukimin financiar mbetet reduktimi i përdorimit të parasë cash, duke e konsideruar një proces të ngadaltë, por të domosdoshëm për modernizimin e sistemit financiar në Shqipëri. E ardhmja e pagesave, sipas tij, është e digjitalizuar, pa cash dhe pa karta fizike, me zgjidhje si click-to-pay dhe pagesa përmes pajisjeve smart. Në këtë rrugë, roli i Pago është të ofrojë siguri dhe inovacion, duke ndërtuar besimin e nevojshëm te përdoruesit për të përqafuar teknologjinë.