Arlind Haxhijaj: Gig Economy po e kthen Shqipërinë në një treg pune pa kufij, freelancing nuk është më një zgjidhje e përkohshme

Arlind Haxhijaj, themelues dhe menaxher i përgjithshëm i Coolab, e sheh zhvillimin e Gig Economy në Shqipëri si një ndryshim strukturor në mënyrën se si profesionistët punojnë dhe kompanitë aksesojnë talentin. Sipas tij, freelancing nuk është më një zgjidhje e përkohshme për të rinjtë, por për shumë profesionistë është shndërruar në një zgjedhje karriere afatgjatë. Mundësia për të jetuar në Shqipëri dhe për të punuar me klientë e kompani ndërkombëtare po e bën tregun e punës gjithnjë e më pak të varur nga kufijtë gjeografikë. Haxhijaj vëren se coworking-u po luan një rol të rëndësishëm në këtë transformim. Në Coolab, nomadët digjitalë dhe profesionistët që punojnë në distancë janë tashmë pjesë e përditshme e komunitetit. Prania e tyre krijon mundësi për shkëmbim njohurish, kontakte dhe bashkëpunime mes talentit vendas dhe profesionistëve që punojnë për kompani globale. Për të, vlera e coworking-ut nuk qëndron vetëm te hapësira fizike, por te rrjeti, eksperienca dhe njohuria që qarkullojnë brenda komunitetit. Sa i përket barrierave, Haxhijaj nuk e konsideron taksimin pengesën kryesore. Sfidën më të madhe e sheh te mënyra se si institucionet ndërveprojnë me ekonominë e re të punës. Profesionistët që punojnë për klientë në disa vende mund të mos përshtaten lehtësisht me kategoritë dhe procedurat tradicionale administrative. Për këtë arsye, ai argumenton se duhen procedura më të qarta, më të thjeshta dhe një kuptim më i mirë institucional i punës remote dhe freelance. Përballë tregjeve më të mëdha si Serbia dhe Rumania, Shqipëria nuk mund të konkurrojë vetëm me madhësinë. Avantazhi, sipas tij, është një brez i ri profesionistësh që flasin gjuhë të huaja, janë rritur me internetin dhe janë të gatshëm të punojnë globalisht. Haxhijaj parashikon një treg ku zyrat nuk zhduken, por ndryshojnë funksion. Ato do të shërbejnë më shumë për bashkëpunim dhe komunitet, ndërsa gjithnjë e më shumë shqiptarë do të punojnë për klientë globalë nga Shqipëria. Për të, kjo është një mundësi që talenti dhe njohuria të qëndrojnë në qarkullim dhe të krijojnë vlerë edhe brenda ekonomisë vendase.