Shqipëria, e njohur shpesh si “perla e fshehur e Ballkanit”, po dalë nga kjo fshehtësi duke u shndërruar në një destinacion shumë të kërkuar turistik. Sipas Elite Travel Group, jugut të vendit, me destinacione si Vlora, Saranda dhe Gjirokastra, i shtohet rritja e interesit për veriun, sidomos për turizmin kulturor dhe aventurat në natyrë. Një destinacion që po fiton popullaritet është edhe Vuthaj në Mal të Zi, me rritje kërkese prej rreth 300%, për shkak të peizazheve malore dhe rrugës piktoreske. Turisti modern shqiptar kërkon më pak luks dhe më shumë përvoja autentike dhe të qëndrueshme, si ecje në natyrë, rafting, vizita në qytete historike, dhe degustime të verës dhe ushqimeve tradicionale. Pavarësisht pritshmërive të larta për sezonin 2025, sfidat mbeten: çmimet shpesh krahasohen me destinacione më të zhvilluara, por cilësia e shërbimeve nuk i përmbush ato, dhe mungesa e stafit të trajnuar profesionalisht mbetet problem. Në nivel ndërkombëtar, Shqipëria po përjeton një bum mediatik me tituj që e vendosin atë si destinacionin më të mirë evropian për vitin 2025, me vlerësime për mikpritjen, natyrën dhe çmimet e përballueshme. Destinacione si Riviera Shqiptare, qytetet historike Berat, Gjirokastër, Butrint, Tirana, Alpet dhe lumi Vjosa, si dhe agroturizmi dhe gastronomia lokale, janë në qendër të vëmendjes. Disa fakte interesante për Shqipërinë: plazhet me ujëra kristal të Detit Jon, kështjellat historike në qytete si Gjirokastra dhe Berati, siguria e lartë për turistët, lidhja me Korfuzin në vetëm 30 minuta traget, dhe gastronomia që përfshin midhje të famshme dhe rakinë, pija kombëtare që shoqëron çdo takim dhe vakt. Shqipëria ofron qëndrime deri në një vit pa vizë, duke e bërë atë një destinacion tërheqës për turistë dhe punonjës në distancë.