Dr. Luke është startup-i shqiptar që synon të zhvillojë asistencën mjekësore në distancë, por edhe të menaxhojë mbarëvajtjen e shëndetit tuaj. Një startup i nisur në periudhën e pandemisë, sot ka në fokus zonat e thella dhe moshat e mëdha, apo personat e vetëm në familje, të cilët kanë më shumë nevojë dhe më pak akses në strukturat mjekësore. Dr.Luke ka marrë pjesë në disa kompeticione dhe është vlerësuar nga disa investitorë si potencial për zhvillim. Ne ju sjellim pikat kryesore të këtij startupi pas bisedës me Sindi Dervishaj, themeluese e Dr. Luke.

Ideja dhe inspirimi i Dr.Luke . 

Dr. Luke ka lindur në një kohë kur kriza globale shëndetësore kërkonte zgjidhje të reja dhe inovative. Pandemia Covid-19 demonstroi nevojën urgjente për të sjellë shërbimet mjekësore më afër njerëzve përmes teknologjisë. Pjesëmarrja në samitin global Intelligent Health në Bazel, Zvicër, në shtator 2022, ishte një pikë kthese. Ndërsa u njoh me startup-et më të përparuara në fushën e e-health, Sindi pa potencialin për të sjellë një zgjidhje të tillë në Shqipëri, duke hapur rrugën për transformimin e kujdesit shëndetësor në vendin tonë.

Misioni dhe vizioni i Dr.Luke .

Në zemër të Dr. Luke është misioni për të transformuar përvojën e pacientit në rajonin shqipfolës, duke përdorur teknologjinë si një mjet për të ndërtuar një sistem shëndetësor më të integruar, efikas dhe të orientuar drejt të ardhmes. Vizioni ynë shkon përtej kufijve kombëtarë; synojmë të vendosim standarde të reja në inovacionin e shëndetësisë dixhitale, duke kontribuar njëkohësisht në përmirësimin e shëndetit publik dhe mirëqenies së popullsisë.

Sfida dhe pengesat e Dr.Luke.

Sfida më e madhe është ndryshimi i perceptimit të publikut dhe profesionistëve të kujdesit shëndetësor ndaj telemedicinës. Megjithatë, drejtuesit besojnë se me edukim të vazhdueshëm dhe prova konkrete të përfitimeve, mund të tejkalohen këtë pengesa. Një tjetër sfidë madhore është sigurimi i financimeve dhe partneriteteve strategjike, jetike për zhvillimin e teknologjisë së telemedicinës, e cila kërkon investime të konsiderueshme. Por me këmbëngulje dhe një vizion të qartë, drejtuesit janë të bindur se do t'i tejkalojnë këto sfida."

Ecuria aktuale dhe planet për të ardhmen.

Aktualisht, si pjesë e programit të EIT Health për 100 themelueset më të suksesshme në medtech, startupi ka përfituar nga mentorimi i disa prej mendjeve më të ndritura në këtë industri. Suksesi i pjesëmarrjes së tyre në Samitin Global për Intelligent Health këtë shtator si një startup, jo vetëm si vizitorë, do të jetë një dëshmi e përkushtimit të tyre për të çuar përpara inovacionin shëndetësor në Shqipëri. Me një kontratë në horizont me një kompani britanike lider në shëndetësinë dixhitale, startupi është në prag të zhvillimit të një aplikacioni të sigurt që do të sjellë revolucionin e telemedicinës në tregun tonë."

Origjina e emrit dhe qasja.

Emri 'Dr. Luke' është një homazh për Shën Lukën, mjekun misionar, i cili përfaqëson dhe përkushtimin te startupit ndaj pacientëve dhe kujdesit të tyre. Skuadra themeluese synon që çdo shërbim të jetë i orientuar drejt nevojave të pacientit, duke reflektuar mësimet e fituara nga sfidat me të cilat përballet sistemi shëndetësor shqiptar. Në përputhje me SDG 3, angazhohet të kontribuojë për të siguruar shëndet dhe mirëqenie për të gjithë, duke përmirësuar qasjen në kujdesin shëndetësor dhe duke zhvilluar shërbime që promovojnë një shëndet të qëndrueshëm dhe inovativ.

Platforma e integruar nuk do të jetë vetëm një vend për të skeduluar konsulta në distancë, por një mjet gjithëpërfshirës për menaxhimin e shëndetit të pacientëve. Nga monitorimi i sëmundjeve kronike deri te qasja në burime të përditësuara shkencore, duke ofruar një zgjidhje holistike për nevojat e kujdesit shëndetësor. Teknologjia që po zhvillohet do të sigurojë që pacientët të kenë në duar mjetet e nevojshme për të marrë vendime të informuara për shëndetin e tyre.

Roli i inteligjencës artificiale.

Inteligjenca artificiale është thelbi i strategjisë së startupit për të sjellë inovacionin në shëndetësinë dixhitale. Duke analizuar të dhënat shëndetësore dhe personalizuar trajtimet për çdo pacient, AI do të përmirësojë efikasitetin e kujdesit shëndetësor dhe do të ndihmojë në trajtimin e sfidave komplekse shëndetësore. startupi po shfrytëzon fuqinë e AI për të ndihmuar në ofrimin e kujdesit më të mirë të mundshëm, duke sjellë një përmirësim të ndjeshëm në jetën e pacientëve, sidomos në një kohë kur pandemia ka rritur nevojën për zgjidhje të telemedicinës.

Zgjerimi dhe partneritetet e Dr.Luke.

Duke parë potencialin e madh që ofron tregu i shëndetësisë dixhitale, plani është për zgjerimin e pranisë në rajonin shqipfolës, duke përfshirë Kosovën dhe Maqedoninë. Aktualisht startup-i po kërkon aktivisht partneritete strategjike me kompani ndërkombëtare që ndajnë vizionin, për të sjellë zgjidhje të reja dhe inovative për klientelën, duke zgjeruar shërbimet përtej kufijve të Shqipërisë.

Përvoja dhe pasioni për inovacionin.

Dymbëdhjetë vite më parë, Sindi Dervishaj ishte ndër të rinjtë më të talentuar në teknologji dhe inovacion, dhe tani po e përdor këtë përvojë për të ndikuar pozitivisht në shëndetin e njerëzve. Integrimi i teknologjisë me mjekësinë nuk është vetëm një ambicie profesionale, por një mision personal për të dhe tregon se i është përkushtuar të sjellë ndryshim në kujdesin shëndetësor nëpërmjet kësaj sipërmarrjeje."

"Në të ardhmen, Dr. Luke synon të konsolidohet si lider në fushën e telemedicinës në Shqipëri. Plani është që të zhvillohet më tej, duke investuar në teknologji të reja dhe duke zgjeruar gamën e shërbimeve që ofron. Kjo do t’i mundësojë të përmbushë nevojat e pacientëve dhe të kontribuojë në përmirësimin e shëndetit publik në rajonin tonë.