Në epokën e ekspozimit maksimal të të dhënave personale, Shqipëria ka miratuar ligjin nr. 124/2024 për mbrojtjen e të dhënave, plotësisht në përputhje me GDPR-in europian. Ky ligj rrit standardet e privatësisë, zgjeron të drejtat e individëve, si “e drejta për t’u harruar” dhe “transferueshmëria e të dhënave”, dhe vendos detyrime më të forta për kontrolluesit dhe përpunuesit e të dhënave. Një risi e rëndësishme është koncepti “Privacy by design and by default”, që kërkon integrimin e mbrojtjes së të dhënave që në fazat e para të zhvillimit të teknologjive. Ligji përfshin detyrimin për emërimin e Nëpunësit të Mbrojtjes së të Dhënave (DPO) për bizneset që përpunojnë të dhëna në shkallë të gjerë, si dhe detyrimin për raportimin e shkeljeve të sigurisë brenda 72 orëve te Zyra e Komisionerit. Gjithashtu, parashikohen kode sjelljeje, certifikime dhe rregulla për përpunimin e të dhënave në hetime penale. Ndërgjegjësimi i bizneseve shqiptare është rritur, veçanërisht te kompanitë e mëdha, por mungesa e kulturës së privatësisë dhe aksesit në trajnim mbetet sfidë. Bizneset që përpunojnë të dhëna sensitive, si shëndeti apo financat, janë më të ekspozuara dhe duhet të zbatojnë masa të forta sigurie si enkriptim, menaxhim fjalëkalimesh dhe kufizim aksesesh. “E drejta për t’u harruar” kërkon politika të qarta për fshirjen e të dhënave dhe investim në teknologji që sigurojnë fshirje të qëndrueshme. Në rast rrjedhje të të dhënave, bizneset duhet të njoftojnë Komisionerin brenda 72 orëve dhe të marrin masa për zbutjen e efekteve. Ligji kërkon mbajtjen e regjistrave të përpunimit të të dhënave për transparencë dhe monitorim. Trajnime dhe ndërgjegjësim për bizneset e vogla dhe të mesme po zhvillohen nga Zyra e Komisionerit. Në lidhje me ndëshkimet, shkeljet mund të gjobiten deri në 2 miliardë lekë ose 4% të xhiros vjetore, plus masa korrigjuese si ndalime për përpunim të mëtejshëm. Zyra e Komisionerit ka hartuar një metodologji për sanksionet me qëllim efektivitet dhe proporcionalitet. Ky ligj shënon një hap të rëndësishëm për forcimin e mbrojtjes së privatësisë dhe përmirësimin e kulturës së përgjegjshmërisë në Shqipëri.