Investitori engjëll Shefqet Avdullau, me një portofol prej 16 startup-esh dhe dy exit-e të suksesshme, ndan përvojën dhe këshillat e tij për sipërmarrësit shqiptarë që duan të tërheqin investime, të rrisin biznesin dhe të kuptojnë potencialin e tregut shqiptar dhe jo vetëm. “Shqipëria ka thesare të fshehura,” thotë ai, duke u fokusuar në tre vertikale kryesore: Fintech, Adtech dhe Healthtech. Sipas Avdullaut, vendi ka talent të jashtëzakonshëm në zhvillimin e software-it dhe ekspertizë në BPO, që mund të bashkohen për të krijuar startup-e që jo vetëm prodhojnë, por dinë edhe t’i shesin produktet. “Diaspora është një mundësi e artë,” shton ai, për të siguruar prezencën në tregjet ndërkombëtare që nga dita e parë. Kur pyetet se çfarë e bën një startup tërheqës për investitorët, Avdullau thekson se “ekipi është gjithçka”. Checklist-i i tij përfshin: bashkëthemelues me aftësi plotësuese, lidhje personale dhe obsesive me problemin që zgjidhin, gatishmëri për të dëgjuar këshilla dhe një treg të mjaftueshëm për produktin e tyre. Këshillat kryesore për sipërmarrësit janë të qarta: ndërtoni ekipin e duhur para produktit; mos u tërhiqni vetëm nga tendencat e tregut; dhe ndërtoni këtu, por synoni botën. Avdullau sugjeron përdorimin strategjik të diasporës si urë lidhëse me tregjet ndërkombëtare: “Ata do të jenë imazhi dhe prezenca juaj atje, ndërsa ju ndërtoni produktin këtu. Kjo shpesh është diferenca midis një startup-i lokal dhe një historie suksesi mbarëbotërore.” Ky rubrikë synon të sjellë çdo edicion këshilla të vlefshme nga investitorë të ndryshëm. Lexuesit që kanë pyetje, ide ose shqetësime për të ndarë me një investitor mund të kontaktojnë në marketing@businessmag.al.