Ajo jeton në Austri, por puna e saj shtrihet në shumë vende të botës, ku ndihmon biznese të vogla e të mesme të rriten në mënyrë të qëndrueshme, inovative dhe ndërkombëtare. E përkushtuar ndaj filozofisë së “tranzicionit binjak” – digjitalizim dhe qëndrueshmëri – ajo beson se kompanitë duhet të transformohen për të mbijetuar në një botë në ndryshim të shpejtë. Përvoja e saj ndërkombëtare, sidomos në Vjenë dhe Silicon Valley, i ka dhënë forcën për të krijuar modelin AEROPLANE, një qasje praktike që ndihmon bizneset të përcaktojnë objektivat, të mos rrëzohen dhe të fluturojnë drejt suksesit. Si mentore, ajo ka ndihmuar qindra sipërmarrës në botë, duke ofruar trajnime, konsulencë dhe strategji për rritje dhe eksport. Edhe pse e rrethuar shpesh nga një botë biznesi e dominuar nga burrat, ajo kurrë nuk e ka parë gjininë si pengesë – përkundrazi, ka zgjedhur të flasë me punë dhe rezultate. Sot, ajo bën thirrje që SME-të shqiptare të përqafojnë digjitalizimin dhe inteligjencën artificiale për të qenë konkurruese dhe për të ndërtuar një të ardhme të sigurt. Këshilla e saj për sipërmarrësit e rinj: “Gjej çfarë të pëlqen dhe bëje më mirë se të gjithë. Ky është sekreti i lumturisë dhe i pavarësisë financiare.”