Miriam Neziri Angoni, menaxhere me eksperiencë në drejtimin e programeve të Bashkimit Evropian për zhvillim të qëndrueshëm, analizon rolin kyç të grave në tranzicionin e Shqipërisë drejt një ekonomie më të gjelbër. Sipas saj, nismat si “Green Queen Award” janë instrumente të rëndësishme për nxitjen e ekonomisë së gjelbër, duke motivuar sipërmarrjet e vogla dhe të mesme të adoptojnë modele qarkulluese, të reduktojnë mbetjet dhe të krijojnë produkte më inovative dhe të pastra. Vlerësimi i grave sipërmarrëse që janë në pararojë të këtyre ndryshimeve forcon një kulturë të re ekonomike, ku qëndrueshmëria dhe krijimi i vlerës shkojnë dorë për dore. Angoni thekson se këto iniciativa përputhen drejtpërdrejt me vizionin e BE-së për Shqipërinë, duke ndihmuar krijimin e një ekonomie konkurruese dhe moderne, e cila respekton mjedisin dhe ecën drejt standardeve europiane. Ajo vlerëson veçanërisht kreativitetin, guximin për të eksperimentuar dhe aftësinë e grave për të identifikuar problemet mjedisore dhe për t’i kthyer ato në mundësi biznesi. Lidershipi i tyre shtrihet përtej biznesit, duke përfshirë përgjegjësinë komunitare, mbështetjen e grave të tjera, edukimin e fëmijëve dhe promovimin e mënyrave të shëndetshme të jetesës. Sektoret më të dominuara aktualisht nga sipërmarrjet e grave janë përdorimi i produkteve natyrore dhe kozmetika e qëndrueshme, agro-përpunimi dhe gastronomia e bazuar në produkte lokale dhe organike, si dhe prodhime artizanale të orientuara drejt ripërdorimit dhe zero-mbetjes. Ka gjithashtu një interes në rritje për riciklimin, ripërdorimin e materialeve dhe ekonominë qarkulluese. Kjo tregon një qasje pragmatike: gratë ndërtojnë biznese të qëndrueshme, të rrënjosura në komunitet dhe të orientuara drejt tregjeve moderne. Angoni thekson se gratë shqiptare kanë potencial të madh për të udhëhequr ndryshimin, duke kombinuar kreativitetin, vizionin afatgjatë dhe ndjeshmërinë ndaj mjedisit. Faktorë që e mundësojnë këtë rol përfshijnë ndërgjegjësimin mbi qëndrueshmërinë, aksesin në programe mbështetëse dhe financime të BE-së, si dhe arsimimin dhe kulturën e re të sipërmarrjes që po konsolidohet në vend. Sfida mbeten qasja në financa, mbështetja teknike dhe rrjetëzimi, por nëse adresohen, gratë mund të jenë jo vetëm pjesë e transformimit, por edhe udhëheqëset kryesore të tij.