Si Global Head of Product në EY, Endri Mataj drejton një ekip ndërkombëtar me mbi 100 profesionistë, duke zhvilluar zgjidhje që integrojnë inteligjencën artificiale me etikën digjitale në sektorë kritikë si përputhshmëria financiare dhe menaxhimi i pasurisë. Një nga vendimet më sfiduese ka qenë integrimi i GenAI dhe Agentic AI, që kërkoi ekuilibër mes inovacionit dhe ruajtjes së standardeve të sigurisë dhe përputhshmërisë. Suksesi u mat përmes rritjes së efikasitetit operativ dhe përmirësimit të përvojës së përdoruesve. Endri thekson tri sfida kyçe në përdorimin e AI: ndërtimi i “guardrails” për transparencë dhe kontroll, përshtatja ligjore e modeleve në kontekste të ndryshme dhe shmangia e “halucinacioneve” me monitorim të vazhdueshëm. Sipas tij, zgjidhjet e fuqishme nuk kërkojnë vetëm performancë teknike, por edhe arkitekturë me transparencë dhe përgjegjësi. Platforma self-service dhe agjentët AI po transformojnë mënyrën e onboardimit dhe analizës së klientëve përmes pesë kategorive agjentësh që veprojnë në mënyrë autonome dhe të koordinuar. Për profesionistët e rinj, Endri këshillon të kuptojnë thellësisht nevojat e biznesit, të investojnë vazhdimisht në zhvillimin profesional dhe të mësojnë si të aplikojnë teknologjinë në zgjidhje reale dhe me ndikim. Si ish-Këshilltar për Teknologjinë pranë Kryeministrit, ai kontribuoi në revolucionin digjital të tregut të telekomit në Shqipëri, duke ulur ndjeshëm çmimet dhe rritur shpejtësinë e internetit. Përvoja si bursist Fulbright e ka formuar në udhëheqje të ndjeshme, me bindjen se njohuria merr vlerë kur vihet në shërbim të shoqërisë.