Banka Evropiane e Investimeve (BEI), shpesh cilësuar si “krahu financiar i BE-së”, po luan një rol kyç në zhvillimin e qëndrueshëm të Shqipërisë, duke përkthyer vizionin evropian në projekte konkrete: nga hekurudha Durrës–Rrogozhinë te investimet në energji të gjelbër dhe transformimi digjital. Në një intervistë me Business Magazine, përfaqësuesja e BEI-së në Shqipëri, Petia Manolova, thekson angazhimin e bankës për të përmirësuar jetën e qytetarëve përmes financimeve, granteve dhe asistencës teknike. Prioritetet e BEI-së për 5 vitet e ardhshme përfshijnë infrastrukturën e qëndrueshme, energjinë e rinovueshme, mbështetjen për NVM-të dhe përmirësimin e aksesit në internet. Po ashtu, theksohet rëndësia e përshtatjes klimatike, me projekte që parandalojnë përmbytjet dhe rrisin qëndrueshmërinë. Në vitin 2024, BEI investoi një rekord prej 4,6 miliardë eurosh në përshtatjen klimatike, me përfitime të pritshme edhe për Shqipërinë. Manolova nënvizon gjithashtu rolin në rritje të sipërmarrjes femërore dhe rëndësinë e mbështetjes për sektorin privat nëpërmjet instrumenteve financiare që mundësojnë rritjen dhe digjitalizimin. Mesazhi i saj për Shqipërinë është i qartë: BEI është e gatshme të shkallëzojë praninë e saj për të përshpejtuar integrimin evropian dhe zhvillimin e qëndrueshëm të vendit.