Silvio Gonzato: Ekonomia shqiptare po hyn në testin real të integrimit evropian, reformat mbeten prova vendimtare!

Ambasadori i Bashkimit Evropian në Shqipëri, Silvio Gonzato, vlerëson se ekonomia shqiptare ka bërë progres të rëndësishëm në vitet e fundit, duke ruajtur ritme pozitive rritjeje, stabilitet makroekonomik dhe një nivel në rritje të investimeve. Megjithatë, ai thekson se faza e ardhshme e integrimit evropian nuk do të matet vetëm me tregues ekonomikë, por me aftësinë e vendit për të zbatuar reforma të qëndrueshme dhe për të ndërtuar institucione të fort Sipas Gonzatos, Bashkimi Evropian mbetet partneri kryesor ekonomik i Shqipërisë, ndërsa iniciativa si Plani i Rritjes për Ballkanin Perëndimor dhe fondet e dedikuara për reformat synojnë të përshpejtojnë integrimin ekonomik dhe konkurrueshmërinë e vendit. Ai nënvizon se sundimi i ligjit, lufta kundër korrupsionit, përmirësimi i klimës së biznesit dhe reduktimi i informalitetit mbeten prioritetet më të rëndësishme për të fituar besimin e investitorëve dhe për t’u afruar me tregun e përbashkët evropian. Ambasadori identifikon energjinë e rinovueshme, infrastrukturën, turizmin e qëndrueshëm dhe ekonominë digjitale si sektorët me potencialin më të madh për investime evropiane. Në të njëjtën kohë, ai e konsideron zhvillimin e kapitalit njerëzor dhe aftësive digjitale si faktor vendimtar për të përballuar emigrimin dhe mungesën e fuqisë punëtore të kualifikuar. Lidhur me tranzicionin e gjelbër, Gonzato beson se Shqipëria ka mundësi reale të pozicionohet si një vend pionier në rajon falë potencialit të saj energjetik dhe burimeve natyrore, por kjo kërkon investime të vazhdueshme në energji të rinovueshme, ekonomi qarkulluese dhe zhvillim të qëndrueshëm. Në përfundim, ai shprehet se objektivi i Shqipërisë për anëtarësim në Bashkimin Evropian deri në vitin 2030 është ambicioz, por i arritshëm, nëse reformat përshpejtohen dhe zbatohen me sukses në praktikë.