Durana Tech Park po konsolidohet si një nga projektet më ambicioze të dekadës në Shqipëri, duke e lidhur vendin me hartën globale të inovacionit dhe teknologjisë. Nën drejtimin e CEO-së Florensa Haxhi, projekti ka evoluar nga një ide e lindur brenda Albanian Investment Corporation (AIC) në një realitet që tërheq kompani në fusha si AI, cybersecurity, big data dhe zhvillim software, duke krijuar një urë për eksportin e teknologjisë “Made in Albania”. Florensa Haxhi shpjegon se rrugëtimi i saj drejt Duranës ishte një vazhdimësi e natyrshme e karrierës, filluar nga puna në Kryeministri në strategji kombëtare për zhvillimin dhe startup-et, më pas në AIC, ku konceptoi projekte strategjike për ekonominë shqiptare. Ajo ka qenë pjesë e hartimit të ligjit për parqet teknologjike dhe planit zhvillimor të parkut të parë të këtij lloji në vend. Për Haxhin, Durana nuk është thjesht një detyrë profesionale, por një mision personal dhe historik për të ndërtuar bazat e zhvillimit teknologjik të Shqipërisë. Që nga hapja zyrtare në mars 2025, Durana ka krijuar një ekosistem funksional me 51 kompani dhe startup-e, të përqendruara në AI, Big Data, cybersecurity, zhvillim software dhe edukim teknologjik. Parku funksionon si një platformë bashkëpunimi, ku universitetet, kompanitë dhe institucionet lidhen për të ndërtuar projekte dhe spin-off akademike. Përveç krijimit të vendeve të reja të punës, Durana ofron mundësi për eksporte teknologjike dhe pjesëmarrje në rrjete globale si Shoqata Ndërkombëtare e Parqeve Teknologjike (IASP) dhe partneritete me aktorë si Plug and Play. Durana Tech Park është gjithashtu një pikë hyrëse për investitorë të huaj, duke ofruar një proces të strukturuar dhe të qartë për aplikimet, koordinimin dhe incentivimin fiskal. Projekti ka filluar si park virtual dhe tani po përgatitet për ndërtimin fizik, që pritet të nisë në gjysmën e parë të vitit 2026. Faza e parë do të përfshijë 14 hektarë nga 52 planifikuar, duke krijuar një “qytet teknologjik” me zyra, hapësira co-working, ambiente rekreative dhe komerciale, ku puna, bashkëpunimi dhe zhvillimi profesional do të bashkëjetojnë. Florensa Haxhi thekson se Durana tashmë po ndikon në zhvillimin e ekosistemit të inovacionit dhe teknologjisë në Shqipëri dhe se me ndërtimin e kampusit fizik, ndikimi i saj do të shumëfishohet, duke krijuar një mjedis funksional dhe frymëzues për talentet dhe kompanitë teknologjike.