Founder Mindset/ Erion Yzeiri vs Deivis Shomo: Jo çdo këshillë vlen dhe jo çdo plan është në dorën tonë!

Founder Mindset/ Erion Yzeiri dhe Deivis Shomo: Jo çdo këshillë vlen dhe jo çdo plan është në dorën tonë Çfarë ndodh në mendjen e një sipërmarrësi kur gjërat nuk shkojnë sipas planit? Në rubrikën “Founder Mindset”, Erion Yzeiri, CEO i Vitalux, dhe Deivis Shomo, themelues i CityRiddler dhe drejtues i EasyPay, ndajnë reflektime mbi vendimet, gabimet dhe mësimet që kanë formësuar rrugëtimin e tyre sipërmarrës. Për Yzeirin, momenti kur kuptoi se po ndërtonte një kompani dhe jo thjesht po krijonte më shumë punë për veten erdhi me rritjen e ekipit dhe përgjegjësive që shoqërojnë menaxhimin e njerëzve. Ai pranon se një nga gabimet për të cilat është sot mirënjohës ishte nisja e një rruge të vështirë pa qenë plotësisht i vetëdijshëm për sfidat që e prisnin. Sipas tij, po t’i kishte njohur të gjitha vështirësitë paraprakisht, ndoshta nuk do ta kishte ndërmarrë fare atë rrugëtim. Edhe pse planifikimi ka rëndësinë e vet, Yzeiri thekson se energjia më e madhe vjen nga vizioni për të krijuar diçka të re. Në momentet e presionit, ai zgjedh të largohet për pak nga zhurma e përditshme dhe të pedalojë me biçikletë në Tiranë ose pranë Liqenit Artificial, një ritual që e ndihmon të rikthehet më i kthjellët në vendimmarrje. Një nga reflektimet më interesante të tij lidhet me këshillat në biznes. Ai paralajmëron sipërmarrësit e rinj që të mos marrin si të mirëqenë çdo këshillë që dëgjojnë, edhe kur vjen nga njerëz të afërt. Për të, vlera e një këshille qëndron te eksperienca e personit që e jep. Nëse dikush nuk e ka përshkuar vetë rrugën që po ndjek ti, këshilla e tij duhet parë me kujdes. Nga ana tjetër, Deivis Shomo e përshkruan ndërtimin e CityRiddler si një proces gradual. Ai e kuptoi se po ndërtonte një kompani të vërtetë kur projekti filloi të fitonte njohje ndërkombëtare, të pranohej në programe prestigjioze për startup-e dhe të siguronte financime të rëndësishme. Shomo e konsideron si një nga vendimet më të rëndësishme të jetës zgjedhjen për të mos ndjekur rrugën tradicionale të karrierës si inxhinier, por për të eksperimentuar me ndërtimin e kompanisë së tij. Për të, sipërmarrja kërkon një kombinim të vazhdueshëm mes entuziazmit dhe analizës. Entuziazmi të çon drejt një ideje, por janë numrat dhe logjika që vendosin nëse ajo mund të funksionojë. Ndryshe nga perceptimi klasik i një CEO-je, ai e konsideron networking-un si një kënaqësi personale dhe jo vetëm si detyrë profesionale. Takimet me njerëz të rinj dhe bisedat jashtë rrethit të biznesit janë shpesh burim frymëzimi dhe perspektivash të reja. Pavarësisht dallimeve në rrugëtimin e tyre, të dy sipërmarrësit ndajnë një bindje të përbashkët: nuk ekziston një formulë perfekte për suksesin. Vendimet merren me informacionin që ke në atë moment, gabimet janë pjesë e procesit dhe fokusi mbetet më i rëndësishëm se çdo mundësi e humbur. Në fund, sipërmarrja nuk ka të bëjë vetëm me strategjitë dhe planet e biznesit, por edhe me aftësinë për të mësuar, për t’u përshtatur dhe për të vazhduar përpara edhe kur rruga bëhet e paqartë.